Agama Dan Budaya Kita : oleh Aqse Syahid

Assyahid (Insya Alloh) Sayyid Quthb perne nulis kayak gini : Iketan Igame ini (Islam) bukan iketan darah, nasab, dan bukan iketan tane air dan bangse, bukan iketan kaum dan warge, bukan iketan warne kulit, dan bahase, bukan iketan ras dan suku, juga bukan iketan profesi dan status sosial. Gak ade iketan nyang bener-bener (haq) kecuali iketan nyang berdasarkan aqidah Islam. Sedang iketan-iketan dan hubungan lainnye, cuman paham jahiliyah. Kaum Muslimin kudu ninggalin semue iketan dan hubungan nyang bersifat jahiliyah ntu.

Untuk lebi jelasnye silakan check di Link ini ==> Eramuslim <==

Manusia kudu bisa ngebedain mane budaye dan mane Igame. Igame bersifat kekal dan Budaye bersifat fana'. Budaye ntu Hasil dari Budi dan Daye manusia. Produk olah fikir, Rasa dan Karsa manusia. Kate pepatah, manusia tempatnye salah dan dose. Manusia ntu mahluk nyang lemah. Jadi ape-ape nyang diciptain manusia, tentu aje banyak kelemahannye di sono-sini. Sedangkan Igame bukanlah Hasil Budi Daye Manusia. Igame adalah produk Alloh SWT Yang Maha Sempurna. Atu-atunye Igame nyang bener (sempurna) cuman Islam doang. Igame nyang laen selaen Islam adalah produk budaye. Ketika suatu saat kudu beradepan ame opsi : PILIH IGAME atawe PILIH BUDAYE ? maka orang nyang akalnye lempeng pastilah milih Igame. iye khan ? bener kagak nih ? jangan diem aje dong ente .. hehehe..

Budaye kudu nyesuain diri ame Igame. Jangan sampe dahh ada kejadian, Igame disesuain atawe dicocok-cocokin ame budaye, karena ntu sama aje melecehkan Sang Pembuat Igame (Alloh SWT Jalla Jalaluh).

Pertanyaannye adalah :
Jadi pegimane kalo kite cinte ame budaye kite (budaye betawi), bole kagak ?

Kalo kate ane :

Bole-bole aje asalkan budaye tersebut kagak nyimpang dari Aqidah dan Syare'at Igame kite (Islam). Tinggalin / perbaharuin nyang nyimpang dan kembangin budaye nyang baek (nyang sesuai ame Ajaran Igame kite) atawe kalo emang mampu, silakan ciptain budaye nyang lebih baek lagi. Gitu doang menurut ane.

================================================== Betawi, Kemis 12 Mei 2011

Demikian aje, semoga bermanfaat dunye-akherat.

Wallohu a'lam Bishowwab.

Penulis :

Anak Betawi Jakarta Asli